في حادثة غريبة: سمير الوافي يكشف ما حدث له أمام منزله وداخل سيارته
موقع "مجتهد": كتب سمير الوافي:
البارح وأنا راجع للدار في كرهبتي نشوف من بعيد في بلاصة فارغة متاع كرهبة قدام العمارة...وطبعا البخل خلاني نفضلها على بلاصة آمنة في السو صول...وأنا نحاول ندوبل على كرهبة تمشي قدامي باش نسبق للبلاصة...نتفاجئ بيها تسبقني وتاخذها وتاقف غادي فيها...وكليت بعضي وغاضتني البلاصة وسبيت الحظ والزهر وبختي في اللحظة هذيكة...ونقمت على السيد اللي سبقني وقحرتلو وتعديت...وهبطت كرهبتي للباركينغ سو صول وكسرت راسي شوية في إدخالها لبلاصتها الصعيبة...وطلعت على روحي لداري...!!
والصباح هبطت فقاللي العساس " البارح سرقوا وكسروا ثلاثة كراهب بايتين قدام العمارة "...واكتشفت أنو الكرهبة اللي فكتلي بلاصتي كانت من أول الضحايا وأكثرهم تضررا...!!!
يعني بدون شماتة...تلك الآية العظيمة الرهيبة " وعسى أن تكرهوا شيئا وهو خير لكم"...ساعات تتجسد في أبسط المواقف...وفي أصغر الوضعيات...سبحان الله والحمد لله...فالسيارة التي ظننتها حرمتني من مكان...إكتشفت أنها أنقذتني من مصيبة...!!!
